لەکاتی دروستکردنی کۆرسی دیجیتاڵی، ئەم ٧ هەڵەیە مەکە

ئامادەکردنی : م.ی ڕاوێژ کامەران

بازاڕی کۆرسە دیجیتاڵییەکان بە خێرایی گەشە دەکات و دەرفەتێکی زێڕین بۆ شارەزایان دەڕەخسێنێت تا زانیارییەکانیان بگەیەنن و سەرچاوەی داهاتی نوێ دروست بکەن. بەڵام ئەم ڕێگایە پڕە لە ئاڵنگاری و زۆرێک لە هەوڵەکان بەهۆی چەند هەڵەیەکی باوەوە شکست دەهێنن. بۆ ئەوەی هەوڵ و کاتت بەفیڕۆ نەچن، شارەزایانی ئەم بوارە ئاماژە بە 7 هەڵەی سەرەکی دەکەن کە پێویستە خۆتیان لێ بپارێزیت.

1. دەستپێکردن بەبێ ئەزموونی پراکتیکی

یەکێک لە گەورەترین هۆکارەکانی شکست ئەوەیە کۆرسێک لەسەر بابەتێک دروست بکەیت کە خۆت ئەزموونی کرداریت تێیدا نییە. ئەزموون نەک هەر متمانە (Credibility) لای بەشداربووان دروست دەکات، بەڵکو وادەکات بتوانیت چارەسەری واقیعی و کاریگەر پێشکەش بکەیت. پێویست نییە باشترین شارەزای جیهان بیت، بەڵام گرنگە ئەزموونێکی دەوڵەمەندت هەبێت کە پشتی پێ ببەستیت.

2. بەکەم سەیرکردنی تواناکانی خۆت (هەستی ساختەبوون)

زۆرێک لە کەسانی بەتوانا بەهۆی گومانکردن لە لێهاتوویی خۆیان، پرۆژەکانیان دوادەخەن یان هەرگیز دەستی پێناکەن. ئەم "هەستە ساختەبوون" (Imposter Syndrome) دەتوانێت گەورەترین بەربەست بێت. لەجیاتی چاوەڕوانیی کامڵبوون، تەرکیز بکە سەر پێشکەوتنی بەردەوام و ئەو بەهایەی کە دەتوانیت پێشکەشی بکەیت.

3. دروستکردنی کۆرسێک کە حەز و سۆزت بۆی نییە

حەز و سۆز ئەو سووتەمەنییەیە کە لە قۆناغە سەختەکاندا هانت دەدات. ئەگەر بابەتەکەت بە دڵی خۆت نەبێت، نەک هەر پرۆسەی دروستکردنی کۆرسەکە ماندووکەر دەبێت، بەڵکو وزە و جۆشی پێویستت نابێت بۆ گەیاندنی بە شێوەیەکی کاریگەر. دڵنیابە لەوەی بابەتەکەت تێکەڵەیەکە لە حەز، شارەزایی، و پێداویستیی بازاڕ.

4. کات بەفیڕۆدان لە دەرەوەی "سنووری بلیمەتیی" خۆت

هەموو کەسێک لە چەند بوارێکدا زۆر بەتوانایە، کە پێی دەوترێت "سنووری بلیمەتی" (Zone of Genius). هەڵەیەکی گەورە ئەوەیە کاتێکی زۆر بەسەر ئەو کارانەوە بەفیڕۆ بدەیت کە تێیاندا باش نیت، وەک دیزاینی گرافیک یان مۆنتاژی تەکنیکی. ئەم کارانە بە کەسانی شارەزا بسپێرە و خۆت تەرکیز بکە سەر ناوەڕۆکی کۆرسەکە و گەیاندنی بەها.

5. بیرکردنەوەی هەڵە: یەکەم کۆرس دەبێت کامڵ بێت!

هەوڵدان بۆ ئەوەی هەموو زانیارییەکانت لە یەکەم بەرهەمدا کۆبکەیتەوە، دەبێتە هۆی دروستبوونی کۆرسێکی زۆر قورس و درێژ، کە لەوانەیە بەکارهێنەر ماندوو بکات. یەکەم کۆرسی تۆ پێویست ناکات شاکار بێت؛ گرنگ ئەوەیە بەهایەکی دیاریکراو پێشکەش بکات. دەتوانیت دواتر بەپێی پێداویستیی بەشداربووان، کۆرسەکەت باشتر بکەیت و فراوانی بکەیت.

6. بچووک بیرکردنەوە لە کاتی بڵاوکردنەوەدا

پلانی گەورە پێویستی بە بڵاوکردنەوە (Launch)ی گەورە هەیە. ئەگەر تەنها بە بڵاوکردنەوەی چەند  پۆستێکی سادە لە سۆشیال میدیا کۆرسەکەت بڵاوبکەیتەوە، چاوەڕێی ئەنجامێکی گەورە مەکە. بوێر بە و هەموو کەناڵە بەردەستەکان وەک ڤیدیۆ، وێبینار، و سۆشیاڵ میدیا بەکاربهێنە بۆ ناساندنی بەرهەمەکەت.

7. پشتگوێخستنی دروستکردنی پەیوەندی لەگەڵ بینەر

گەورەترین سەرمایەی تۆ بینەرەکانتن. پێش ئەوەی کۆرسەکەت بڵاوبکەیتەوە، گرنگە پەیوەندییەکی پتەو لەگەڵیاندا دروست بکەیت، بەهایان پێشکەش بکەیت و متمانەیان بەدەست بهێنیت. ئەزموونەکان دەریانخستووە کە بینەرێکی بچووکی دڵسۆز، زۆر باشترە لە بینەرێکی گەورەی سارد و سڕ.

دروستکردنی کۆرسێکی سەرکەوتوو پرۆسەیەکی بەردەوامە و پێویستی بە فێربوون لە هەڵەکان هەیە. بە خۆپاراستن لەم هەڵە باوانە، دەتوانیت ڕێگای سەرکەوتن بۆ خۆت کورت بکەیتەوە و بەرهەمێک دروست بکەیت کە بەڕاستی کاریگەریی هەبێت.